“Monnan soñ wäğ’dälär kiräk tügel. Barı vakśinalar kiräk”

Bötendön’ya sälamätlek saqlaw oyışması ğomum särqatibe Tedros Adxanom Gebreyesus koronavirus vakśinaların büleşüdä ğadelsezlek däwam itsä, tağın da kübräk variantnıñ kilep çığaçağı häm sośial’-iqtisadi qıyınlıqlarnıñ däwam itäçäge xaqında kisätte.  

Ul matbuğat cıyılışında beldergänçä, dön’yada bügengä qadär 5 milliiard 700 million Kovid-19 vakśinası qadalğan. Afrika qıytğasına isä monıñ barı 2 prośentı ğına êläkkän.

Gebreyesus Bötendön’ya sälamätlek saqlaw oyışmasınıñ maqsatı yıl axırına qadär dön’yada här däwlät xalqınıñ 40%ınıñ vakśinalaştırılğan buluı ikänen qabatlap äytte. Afrikada älegä monı 2 il genä başqarğan.

Gebreyesus dön’yada Kovid-19 vakśinaların büleşüdäge ğadelsezlekne tänqıyt’läde. Bolay däwam itkän oçraqta, virusta yaña üzgäreşlär barlıqqa kiläçäk. Bu moñarçı yasalğan vakśinalarnı köçsezländeräçäk yaña variantlar kiterep çığara ala.

Kovid-19 vakśinaları dön’yaküläm ireşü programması arqılı 141 ilgä yaqınça 260 million doza cibärelgän. Gebreyesus vakśina çığaruçı şirkätlärneñ alğa kitkän illär belän ikele kileşülär tözüeneñ êşne awırlaştıruın äytte. Ul 8nçe sentyabr’däge matbuğat cıyılışında da bu mäs’äläne kütärgän ide. Gebreyesus anda alğa kitkän illärneñ vakśina mäs’äläsendä birgän süzlären totmawlarına iğ’tibarnı cälep itep: “Monnan soñ wäğ’dälär kiräk tügel. Barı vakśinalar kiräk,”-dide.