29 yıl êlek törmädän qaçuçı üze teläp birelde

Avstraliyäneñ Yaña Kön’yaq Uêl’s töbägendä 29 yıl êlek törmädän qaçqan 64 yäş’lek Darko Desiç üze poliśiyägä kilep birelde. Anı bu adımğa koronavirus kizüe mäcbür itä.

İlneñ xäbärlärendä yazılğança, Darko Desiç marixuana citeşterüdä ğayeplänep 3 yıl yarımğa räşätkä artına kerä. 13 ay utırğannan soñ ul, 1992nçe yılnıñ 1nçe avgust tönendä timer pıçqısı häm bolt kisüçe şikelle êş qoralları qullanıp Grafton tözätü märkäzennän qaça. Böten êzläwlärgä qaramastan, anı taba almıylar. Desiç Sidneynıñ tön’yaq yarlarına urnaşıp tözeleş êşlärendä qatnaşa häm remont yasıy. Şunnan alğan aqçağa yäşi.

Töbäktä yaqınça 3 ay däwam itüçe qırıs koronavirus tıyuları arqasında qaçaq mäxkümneñ êşläre tulısınça tuqtap qala. Ul torğan urını öçen arenda aqçasın tüli almıy başlıy. Şuña öydän çığıp yar buyında yäşäp qarıy, ämma räşätkä artında bulunıñ, bomj buluğa qarağanda, yaxşıraq ikänen uylap poliśiyägä kilä.  

28nçe sentyabr’ könne ul törmädän qaçuda ğayeplänep mäxkämä qarşısına çığaçaq.