1 milliard dollar wäğ'dä ittelär

“Äfğanstandağı gumanitar xäl” kiñäşmäsendä 1 milliard dollardan artıq xäyriyä wäğ’däse alınğan

1706448
1 milliard dollar wäğ'dä ittelär

Şveyśariyäneñ Jeneva şähärendä oyıştırılğan “Äfğanstandağı gumanitar xäl” kiñäşmäsendä 1 milliard dollardan artıq xäyriyä wäğ’däse alınğan. Bu xaqta BMO ğomum särqatibe Antonio Guterriş belderde. Ul kiñäşmä däwam itkän arada matbuğat cıyılışı uzdırdı.

"Bu kiñäşmä Äfğanstan xalqı belän teläktäşlek mäs’äläsendä kötelgännärgä cawap birde,”-dide Guterriş. Ul çarada barı xökümätlärdän tügel, ictimağıy häm xalıqara oyışmalardan da zur öleş kertelüen assızıqladı.

Kiñäşmädä BMO äğ’zası bulğan 96 däwlät, monnan tış, 33 xalıqara häm regional’, 22 ictimağıy oyışma qatnaşa. Guterriş çarada äfğan xalqı öçen gumanitar yärdäm mexanizmınıñ xäräkätkä kiterelüe öçen tırışlıq kürsätelüennän qanäğat’ qaluın belderde. Barlığı 1 milliard 100 million dollar tiräse xäyriyä yasaw turında wäğ’dä alınğan.

Guterriş Äfğanstanda xalıqnıñ zur gumanitar faciğağa duçar qaluın belderde häm, iq’tisad cimerelsä, barı yärdämnär belän genä ilne qotqaru mömkin bulmayaçağı turında kisätte.  Anıñ äytüençä, Taliban gumanitar yärdäm mäs’äläsendä yazmaça garantiyä birgän. Alar regionnıñ tulısına barıp citü mömkinlegenä ışandırıp qına qalmıy, imin bulmağan cirleklärgä baruçı BMO konvoyınıñ qurqınıçsızlığın täêmin itärgä süz birä. 

Äfğanstanda 38 million keşeneñ yärdämgä ixtiyacı bar. BMO wäqalätleläre citkergänçä, ildäge  3 watandaşnıñ berse qaydan aşarğa tabarğa ikänen belmi. 5 yäş’tän keçkenä balalarnıñ yaqınça yartısınıñ 12 ay êçendä açlıqqa duçar qalaçağı farazlana.



Bäyläneşle xäbärlär