Äfğanstannan kitärgä telämäwçe amerikalılar qaldı

AQŞ däwlät särqatibe Êntoni Blinken Qabuldağı diplomatik missiyälärneñ küçerelüen, ämma qaluçılarğa yärdäm itäçäklären citkerde

1700013
Äfğanstannan kitärgä telämäwçe amerikalılar qaldı

AQŞ däwlät särqatibe Êntoni Blinken bügennän başlap Äfğanstan başqalası Qabuldağı diplomatik missiyälären tuqtatuların häm êşçänleklären Katar başqalası Doxağa küçerülären belderde.

Ul AQŞ üzäk köçlär komandirı Kennet Makkenzinıñ Äfğanstannan çığu tögällänüe turındağı belderüennän soñ matbuğat cıyılışı ütkärde.

Blinken Amerikanıñ bügengä qadär Äfğanstannan 123 meñ keşene êvakuaśiyäläwen citkerde. Alarnıñ 6 meñe genä amerikalı.

Däwlät särqatibe Äfğanstan mäs’äläsendäge diplomatiyä ceplären qullarınnan ıçqındırmayaçaqların assızıqladı.

“Xärbi missiyäbez bette, yaña diplomatik missiyä başlandı. Başta anı alıp baru öçen yaña törkem oyıştırdıq. Qabuldağı diplomatik missiyälärebezne bügennän başlap tuqtatıp torabız häm êşçänlegebez Katar başqalası Doxada däwam itä. Tizdän bu mäs’älädä Kongressqa mäğ’lümat biräçäkbez,”-dide ul.

Blinken Äfğanstanda xäzerge waqıtta ildän kitärgä telämägän 200dän azraq, bälki 100 tiräse AQŞ watandaşı qaluın uylawların äytte. Amerika alarğa häm äfğan xezmättäşlärgä yärdämen däwam itäçäk.

Däwlät särqatibe kiçä wazıyfadaşları belän Äfğanstannan imin säyäxät itüne buldıru häm Qabul aêroportın mömkin qadär irtäräk açu turında söyläşülären citkerde.  

“Bu mäs’älädä bez Törkiyä häm Katarğa tırışlıqları öçen räxmätle. Bu az sanda çarter oçışları täêmin itäçäk häm Äfğanstannan çığarğa teläwçe keşelärgä yärdämçe bulaçaq,”-dide Êntoni Blinken.



Bäyläneşle xäbärlär