174 keşegä - ülem cäzası

Yämändä Xusilärneñ liderı Abdulmälik äl-Xusi häm 173 suğışçığa ülem cäzası qararı çığarıldı. Bu xaqta Yämän armiyäseneñ matbuğat üzäge internet säxifäsendä xäbär itelä.

Qararnı Marib xärbi mäxkämäse çığarğan. Abdulmälik äl-Xusi häm anıñ 173 suğışçısı qanunlı xökümätne tüntärüdä ğayeplänä. Qarar - ülem cäzası häm mal-mölkätlären tartıp alu. Şul uq êş buyınça xökem itelüçe tağın 2 keşene dälillär citmäw säbäple aqladılar.  

Mäxkämä, monnan tış, Xusi xäräkäten tarqatu, terrorçı oyışma bularaq iğ’lan itü, êşçänlegen tıyu häm yabu, barlıq mölkätlären konfiskaśiyäläw, barlıq qoral, suğuış kiräk-yaraqların häm xärbi cihazların alıp ilneñ saqlanu ministrlığına tapşıru qararı da çığara.  

Xusilärdän älegä bu mäs’älä belän bäyle belderü yasalmadı.

Bilgele bulğança, Yämändä ozaq yıllar buyı säyäsi totrıqsızlıq xökem sörä. Moña Xusilär belän xökümät köçläre arasındağı bäreleşlär säbäpçe.

Xusilär 2014nçe yılnıñ sentyabrennän birle başqala Sana häm başqa qayber töbäklärneñ idaräsen üz qulında tota ide. Soğud Ğaräbstanı citäkçelegendäge koaliśiyä köçläre 2015nçe yılnıñ martınnan başlap Yämän xökümätenä alar belän suğışırğa yärdäm itä.