AQŞ 28 meñ keşene êvakuaśiyäläde
Djo Bayden bu êştä üz watandaşlarına östenlek birülären belderde
AQŞ 14nçe avgusttan birle Äfğanstan başqalası Qabuldan 28 meñ keşene êvakuaśiyäläde. Ä iyül’ne dä kertep sanağanda, älege kürsätkeç 33 meñnän artıq. Däwlät başlığı Djo Bayden Aq Yortta uzdırılğan matbuğat cıyılışında bu êştä üz watandaşlarına östenlek birülären belderde. Ul Qabulda iminlek xäleneñ bik tiz räweştä üzgärüen äytä.
Bilgele bulğança, Djo Baydennı êvakuaśiyälär mäs’äläsendä bik nıq tänqıyt’lädelär. Üze ul moña cawap itep bolay di: “Bu qadär keşene, televideniyedän dä kürgänegezçä, ärnü, yuğaltu häm yöräkne telgäläwçe küreneşlärdän başqa êvakuaśiyäläw mömkin tügel”.
Bayden Katar, Germaniyä, Kuveyt häm İspaniyäne dä kertep bik küp däwlät belän êvakuaśiyä turında kileşü tözülären äytte. Êvakuaśiyälängän äfğannarnı älege illärdäge bazalarğa iltälär häm anda iminlek tikşerüläre ütkärelgännän soñ AQŞqa alıp kitälär.
Bayden êvakuaśiyälärne 31nçe avgustqa qadär tögällärgä planlaştıruların belderde. Ul, kiräk bulsa, Talibanğa qarşı sankśiyälärne yaqlayaçağın xäbär itte.