Beyruttağı şartlawğa 1 yıl

Bügen Beyruttağı portta şartlawğa 1 yıl tuldı. Livan xökümäte räise Xassan Diyab bu nisbättän yullama yasadı. Ul, 1 yıl uzuğa qaramastan, yöräklärneñ haman qanawın häm küñel sızlawınıñ basılmawın assızıqladı.

“4nçe avgustta cıyılıp kilgän korrupśiyä skladlarınıñ berse şartladı häm täêsire barlıq mäydannarda cimergeç buldı. Şähitlär birdek, meñnärçä yaralıbız buldı häm toraq mäydannar yuqqa çıqtı. 4nçe avgusttağı şartlaw ilneñ citeşsezleklären kürsätte, Livannı basıp alğan korrupśiyäneñ ber öleşen yaqtığa çığardı. Ul waqıyğa tirändäge däwlätneñ bilgelären, yulsızlıq däwläteneñ kürenüen täêmin itte,”-dide Xassan Diyab.

Ul hälakätneñ êzläreneñ äle dä urınında buluın äytte. “Beyrut portındağı şartlaw belän bäyle xaqıyqat’ açıqlanğanğa qadär Livanda ğadellek bulmas, livanlılar üzlären imin xis itmäs,”-dip söyli xökümät räise.

Hälakätkä 1 yıl tulu nisbätennän Beyrut portındağı şartlawnıñ metal cimerekleklärennän häykäl yasaldı. Anıñ açılışında çit il diplomatları, türälär, xärbi wäqalätlelär häm şartlawda ülüçelärneñ yaqınnarı qatnaştı. Häykälne  “Xärabalardan köçle keşe” dip atıylar.

Beyrut portında 2020nçe yılnıñ 4nçe avgustında şartlatqıç matdälär saqlanuçı depoda başta yanğın çıqtı häm şunnan soñ böten şähärne teträtkän köçle şartlaw buldı. Anda 190nan artıq keşe hälaq buldı, 6 meñnän kübese yaralandı, 300 meñ keşe yort-cirsez qaldı.