"Kuril utrawlarına barudan tıyılığız"

Yaponiyä Mixail Mişustinğa rizasızlığın belderä

1680252
"Kuril utrawlarına barudan tıyılığız"

Yaponiyä Rusiyä xökümäte räise Mixail Mişustinnıñ Kuril utrawlarına säfäre xaqında “bik qızğanıç” dide.

Yaponiyä ministrlar kabinetınıñ baş särqatibe Kato Kaśunobu matbuğat cıyılışında qatğıy rizasızlığın belderde. Anıñ äytüençä, Mişustinnıñ Xokkaydo tön’yağında Kuril utrawları arxipelagına  kerüçe Êtorofu utrawına baruı Yaponiyäneñ Tön’yaq utrawlardağı poziśiyäsenä qarşı kilä häm bik urınsız. Bu nisbättän Rusiyägä protest belderüe cibäreläçäge dä citkerelde.

Mişustinnıñ Yıraq Könçığış häm Seber säfäre 4 kön däwam itte. Xökümät räise anıñ qısalarında Êtorofuğa bardı. Ul utrawdağı ber xastaxanägä häm diñgez tovarların êşkärtü üzägenä kerde.

Tokio xökümät räise Mişustinnıñ utrawlarğa säfärdän tıyılıp toruın taläp itte.  

Sovetlar berlege İkençe Bötendön’ya suğışı axırında - 1945nçe yılda- Yaponiyäneñ 1300 çaqrımğa suzılğan Kuril utrawların basıp aldı. Alege arxipelag Tın okean belän Oxotsk diñgezen ber-bersennän ayırıp tora.

Basıp alu Rusiyä belän Yaponiyä arasında solıx kileşüen imzalaw turındağı söyläşülärneñ näticägä kilüenä komaçawladı. İke yaq älege utrawlar mäs’äläsendä añlaşa almadı.



Bäyläneşle xäbärlär