Vakśina yasawçılarnı üterdelär

Äfğanstanda balalarğa poliyomiyelit vakśinası yasaw belän mäşğul’ 5 mediśina xezmätkäre Taliban höcüme näticäsendä hälaq buldı. Oyışma vakśinalaştırunı Könbatışnıñ üzlärenä qarşı süz quyışuı bularaq kürä. Şuña kürä bu êşkä törleçä qomaçawlıylar.  

Nangarxar töbägendä balalarğa poliomiyelitqa qarşı vakśina yasawçı törkemgä ber ük waqıtta bulğan höcümnärdä kimendä 5 xezmätkärneñ ğomere özelä, yaralanuçılar da bar.

Nangarxar poliśiyä idaräse wäkile Färit Kxan beldergänçä, mediśina xezmätkärläre koordinaśiyäle räweştä säğat’lär êçendä 3 ayırım urında atıp üterelgän.

Cirlektä vakśinalaştıru êşçänlege tuqtatılıp tora.

Taliban älege höcümnär öçen cawaplılığın kire qaqtı.

Yaqınça 3 ay êlek Cälalabadta vakśina yasawçı 3 xatın-qız fel’dşer üterelgän ide.

Taliban häm dini liderlar, ğadättä, cämäğat’çelekkä vakśinalarnıñ möselman balalarnı qısırlaştıru maqsatınnan uylap çığarıluın söyli.

Wäqalätlelär äytüençä, Talibannıñ kontrole astındağı töbäklärdä öydän-öygä yörep vakśina kampaniyäse ütkärügä yul quyılmıy.

BMO ğomum särqatibeneñ Äfğanstan maxsus wäkile urınbasarı Ramiz Alakbarov höcümnärne tänqıyt’läde. Ul Twitterda bolay dip yazdı: “Balalarnı sälamät tormış qurqınıçsızlığınnan mäxrüm itü – keşeleksezlek. Mäg’näsez köç qullanu tutatılırğa, ğayeplelär cawapqa tartılıp ğadel xökemgä tapşırılırğa tiyeş”.