Dön’yadağı iñ ozın asılmalı küper

Dön’yadağı iñ ozın asılmalı cäyäwlelär küpere Portugaliyädä açıldı. Ul UNESCO tarafınnan bötendön’ya mirası isemlegendä urın alğan Aroka geoparkı êçendäge yäşellek häm sarı çäçäklär belän qaplanğan tawlar arasında. Küperneñ ozınlığı – 519 metr. Annan ütep çığu öçen 10 minut tiräse waqıt kiräk. Qorıç çıbıqlar belän totınıp toruçı qorılmadan 175 metr asta Payva yılğası ağa.  

Küper räsmi räweştä açılğanğa qadär Aroka şähärendä yäşäwçelärgä anıñ aşa kiçärgä röxsät itelde. Berençe bulıp ayaq basqan êkskursovod X’yugo Xav’yer: “Beraz qurıqtım, ämma ul moña layıq ide. Ğadättän tış, unikal’ täcribä,”-dide.

Aroka mêrı Margarida Belem: “Dön’yada monıñ şikelle başqa küper yuq,”-dip, proyektnıñ cirlektä tağın da kübräk keşeneñ qaluına yul açaçağın äytte.  

Cirle xalıq yaqınça 2 million 300 meñ yevroğa töşkän häm 2 yıl tözelgän küperneñ, bigräk tä, koronavirus kizüennän soñ töbäkkä sulış örüdä yärdäm itäçägenä ömetlänä.

Proyektnıñ tağın da kübräk investiśiyä, tağın da kübräk turist kiterep Arokağa dinamika östäyäçäge uylanıla.