Yerevanda protestçılar Xökümät yortın bastı

Ärmänstan başqalası Yerevanda Nikol’ Paşin’yanğa protest belderergä çıqqan xalıq Xökümät yortına kerde. Alar şiğar’lär qıçqırıp xökümät räiseneñ wazıyfasınnan kitüen taläp itte. Qısqa waqıttan soñ alar binadan çqtı häm “Telägän cirgä kerä aluıbıznı kürsätergä telädek,”-dip belderde.

Şul uq waqıtta Ärmänstan ilbaşı Armen  Sarkisyan belän xökümät räise Paşin’yan arasında ğomumştab başlığı Onik Gasparyannıñ wazıyfasınnan alınuı belän bäyle añlaşılmawçanlıq däwam itä.

Sarkisyan Paşin’yannıñ ğomumştab başlığı Gasparyannı êştän azat itü xaqındağı qararın kire bordı. Paşin’yan şul uq dokumentnı qabat ilbaşı idaräsenä cibärde.

Xakimiyät häm oppoziśiyä tarafdarları bügen başqala Yerivanda ber ük waqıtta mitinglar oyıştıra. Paşin’yan kiçä Facebookta turıdan-turı êlemtä oyıştırdı häm üzen yaqlawçılarnı uramğa çığarğa çaqırdı. Anıñ tarafdarları cirle waqıt belän kiçke 6 tulıp 30 minutta Cömhüriyät mäydanında cıyılırğa tiyeş. Oppoziśiyä isä Marşall Bagramyan mäydanında 18 säğat’tä mitingın başlıy.

Ministrlar kabinetınnan belderülärençä, Paşin’yan İminlek Şurasın cıyğan. Utırışta ilneñ êçke häm tışqı qurqınıçsızlıq mäs’äläläre kütärelgän.

25nçe fevral’ könne Ärmänstan armiyäse Paşin’yan xökümätenä qarşı tüntäreleş kereşüe yasadı.