İzrailneñ yäşeren qoralları

Yasalma iyärçennän töşerelgän fotolarda İzraildäge atom-töş ob'yektı kürende

1590783
İzrailneñ yäşeren qoralları

İzrail üze raslamasa da, bik küp xalıqara oyışmalar tarafınnan Tel’-Avivnıñ atom-töş qoral citeşterü urını bularaq kürsätelüçe ob’yektında soñğı yıllarnıñ iñ zur tözeleş proyektlarınıñ berse baruı belderelde.  Anı yasalma iyärçen töşergän fotolarda kürälär.

İzrailneñ kön’yağındağı Dimona şähäre tiräsendä Negev atom-töş tikşerenü üzägendäge Şimon Peres reaktorına yaqın noqtada futbol qırı zurlığında häm berniçä qat tirängä töşüçe qazular ütkärelüe açıqlandı. Alarnıñ 2019nçı yılnıñ berençe aylarında başlanuı häm ul waqıttan birle äkren genä baruın farazlıylar.

Fotoräsemnärdä yaqınça 150 metr ozınlığındağı häm 60 metr kiñlegendäge çoqırdan çıqqan balçıq ta kürenä.

Mäğ’lümat agentlıqlarınıñ xäbärlärendä älege proyektnıñ ni öçen alıp barıluınıñ bilgele bulmawı äytelä. İzrail wäqalätleläre älege mäs’älä belän bäyle sorawlarğa cawap birmi.  

Xäbärlärdä xökümät räise Bin’yamin Netan’yaxu idaräseneñ İrannıñ atom-töş êşçänlegenä qarşı kisken tänqıyt’ yawdırğan waqıtta tözeleş alıp baruına iğ’tibar cälep itelä. Şunısı da bar – İrannıñ bu tarmaqtağı adımnarın BMO küzätüçeläre kontrol’dä tota. Ä menä Tährannı tänqıyt’läwçe İzrail isä mondıy kontrol’gä röxsät birmäde.

Vaşingtondağı Qoral kontrole cämğıyäte direktorı Dêril G.Kimball İzrail idaräseneñ Negev atom-töş tikşerenü üzägendäge proyektqa bäyle belderü yasawı kiräklegen citkerde.

İzrail 1950nçe yıllarda Franśiyäneñ yärdäme belän ilneñ kön’yağındağı Dimona şähäre tirälärendäge çüldä atom-töş ob’yektı tözi başlağan ide. Tel’-Aviv idaräse anı AQŞtan da, xalıqara oyışmalardan da yäşerde. Älege ob’yektta citeşterelgän plutoniy yärdämendä İzrailneñ dön’yada atom-töş qoralına iyä 9 däwlättän berse xälenä kilüe belderelä.

İzrailneñ ğamälläre xaqında mäğ’lümat citkermäwe säbäple iyä bulğan qoral küläme bilgele tügel. Qorallanuğa qarşı oyışmalar Tel-Avivnıñ 80 tiräse atom-töş qoralı barlığın farazlıy.



Bäyläneşle xäbärlär