Cılınu öçen kiyemnären yandıralar

Franśiyäneñ tön’yağındağı ber lager’da yäşäwçe migrantlar cılınu öçen kiyemnären yandıra. Hawa temperaturası ul yaqlarda -16 gradusqa qadär töşte.

Grand-Sinte şähärendäge ber urmanda çatırlar qorıp yasalğan lager’da yaqınça 500 qaçaq yäşi. Alarğa daimi räweştä yärdäm itüçe “Utopia 56” ictimağıy oyışması wäqalätleläre cirlektä awır plastik ise buluın, keşelärneñ cılınu öçen kiyemnären yandıruın belderde. Monnan tış, alar lager’da barı tik ber su tankı buluın häm 2 kön suütkärgeçlärneñ qatuı säbäple su belän täêmin itelmäwlären citkerde.

Qaçaqlar Franśiyäneñ tön’yağındağı La-Manşnı kiçep Angliyägä kitärgä isäpli.