AQŞ Meksikadağı sıyınuçılarnı qabul itäçäk

Amerika Quşma Ştatlarınıñ êçke iminlek ministrlığı sıyınu möräcäğate utırışları öçen Meksikada kötep toruçı 25 meñ migrantnıñ ilgä qabul iteläçägen belderde.

Donal’d Tramp 2019nçı yılda Üzäk Amerika däwlätlärennän kilüçelärgä qarata “Meksikada qal programması” qabul itkän ide. AQŞ ilbaşı Djo Bayden üzennän alda bulğan wazıyfadaşınıñ bu protokolınnan baş tarttı.

Êçke iminlek ministrlığınnan yasalğan yazma belderüdä bolay diyelä:

“Migrantlarnı saqlaw programması qısalarında Meksikada qalırğa mäcbür itelgän keşelärgä qağılışlı êşçänlek başlanaçaq. Xäzerge waqıtta sıyınu öçen möräcäğat’ itüçelär isemlegendä 25 meñ keşe bar”.

Belderüdä äytelgänçä, prośessqa 19nçı fevral’dä start birelä. Koronavirus kizüe arqasında iyün’ ayında tuqtatılğan möräcäğat’ qabul itü isä internet aşa qabat başlanaçaq.

“Ber tapqır möräcäğat’ itkän keşelär qaya häm niçek kiläçäkläre xaqında östämä mäğ’lümat alaçaq. Anı almıyça torıp berkem dä çik buyına yaqınlaşmasın,”-diyelä AQŞtan yasalğan belderüdä.