M’yanmada xärbi idarä Facebooknı tıydı

M’yanmada 2020nçe yılnıñ 8nçe noyabrendä uzğan saylawlarda xärämläşü buluın alğa sörep tüntäreleş belän xakimiyätne üz qulına töşergän armiyä sośial’ media platforması Facebooknı waqıtlıça yabu qararı çığardı. Däwlätneñ telekommunikaśiyälär şirkäte MPT häm ildäge şäxsi internet tapşıruçılarğa älege sośial’ çeltärgä ireşüne 7nçe fevral’gä qadär çikläw ämere birelde.

Xökümättän belderülärençä, älege qarar ildä totrıqlılıqnı täêmin itü öçen çığarılğan. “Qayber şäxeslär Facebook aşa yalğan xäbär häm mäğ’lümat urtaqlaşıp xalıq arasında añlaşılmawçanlıqlar tudıra,”-diyelä belderüdä.

Xökümätneñ kürsätmäsennän soñ 23 million qullanuçısı bulğan MRT şirkäte Facebook, annan soñ İnstagram häm Watsapp programmaların tıya. Başqa telekommunikaśiyä şirkätläre isä barı Facebooknı kirtäläw belän çiklänä.

Sośial’ çeltärneñ wäkile Êndi Stoun M’yanmada säxifägä kerep bulmawın rasladı.