Könbatışta koronavirus: soñğı sannar
Qayber könbatış illärendä Kovid-19 kizüe belän bäyle soñğı sannar häm waqıyğalar
Koronavirus säbäple ğomerläre özelüçelärneñ sanı dön’yada 1 million 860 meñ 600 buldı. Virusnı yoqtıruçılar – 86 million 110 meñ, sawığuçılar – 61 million 60 meñnän arttı.
Kizüneñ märkäze AQŞta Kovid-19dan ülüçelärneñ sanı 362 meñ 123 buldı. Yoqtıruçılar isä – 21 million 353 meñ 51 bularaq terkälde.
Angliyädän koronavirus säbäple soñğı 24 säğat’tä 407 keşe ülde, 58 meñ 784 yaña oçraq terkälde. İldä kizüneñ başınnan birle ğomere özelüçelär sanı 75 meñ 431 buldı. Awıruçılar – 2 million 713 meñ 563. Angliyädä mutaśiyä kiçergän koronavirus töreneñ tağın da tiz taraluı säbäple yoqtıru oçraqları arttı häm şuña 3nçe tapqır karantin iğ’lan itelde. Xökümät räise Boris Djonson, xalıqqa möräcäğat’ itep, ğalimnärneñ bu törneñ 50-70% qa yoğışlıraq buluı turındağı süzlärenä ışanuın äytte. Karantinnnıñ kiläse ay urtalarına qadär däwam itüe küzallana.
Franśiyädä Kovid-19 säbäple soñğı 24 säğat’tä 380 keşneñ ğomere özelde häm ülüçelär sanı 65 meñ 415kä citte. İldä şul uq waqıt êçendä koronavirus diagnozı quyılğan keşe sanı 4 meñ 22gä arttı häm 2 million 659 meñ 750gä citte. Êlekkege sälamätlek saqlaw ministrı Xav’yer Bertrand vakśinalaştıru kampaniyäseneñ äkren baruı häm açıq bulmawı nisbätennän ilbaşı Êmmanuêl’ Makronnı tänqıyt’läde.
Kovid-19dan iñ zur zarar kürgän illärneñ başında kilüçe İtaliyada älege çirdän 75 meñ 680 keşe ülde. İldä 2 million 166 meñ 244 keşe virusnı yoqtırdı. İtaliyädä vakśina yasatuçılarnıñ sanı 150 meñnän arttı.
