Yaña yıl qayda niçek ütte?

İñ şäp bäyräm çaraları uza torğan mäydannardan küzätü

1555656
Yaña yıl qayda niçek ütte?

AQŞta Yaña yıl bäyrämeneñ iñ danlıqlı urını bulğan N’yu-York Tayms mäydanında bıyıl küñel açularğa koronavirus külägäse töşte. Här yıl, suıq hawağa qaramastan, mäydanğa yöz meñnärçä keşe cıyıla ide. Bıyıl isä ber törkem çaqırılğan qunaqlar ğına Yaña yılnı qarşı aluda qatnaşa aldı.

“2020nçe yıl kaharmannarı”, yäğ’ni Kovid-19 kizüe belän köräştä alğı saflarda bulğan mediśina xezmätkärläre, aşığıç yärdämdä êşläwçelär häm başqa töp xezmät tarmağınnan yaqınça 40 keşe ğailäläre häm söygännäre belän sośial’ aranı saqlap mäydanda bäyräm çaraların qaradı.  

N’yu-York poliśiyäse mäydannıñ tirä-yünenä barrikadalar qorıp, mömkin bulğan höcümnärgä qarşı iminlek çaraları kürde.

Germaniyä başqalası Berlinnıñ simvolı Brandenburg qapqası qarşında här yıl 100 meñ keşe qatnaşında Yaña yılnı qarşı alu uza ide. Bıyıl ul koronavirus çikläwläre qısalarında ütkärelmäde. Anda barı tik televideniye aşa tapşırılğan konśert quyıldı.

Franśiyädä 31e könne kiçke säğat’ 8 dän irtänge 6ğa qadär uramğa çığu tıyıldı. Başqala Parijnıñ  simvolı Şanz-Êlizedä här yıl ütkärelgän feyerverk şowı Kovid-19 säbäple yasalmadı. Franśuzlar yaña yılğa öylärendä kerergä mäcbür buldı. İldä cämäğat’çelekkä açıq mäydannarda cıyıluçılar bulmasın öçen 100 meñ poliśiyä häm jandarmeriya xezmätkäre küzätep yörde.

İtaliyädä 31nçe dekabr’dä kiçke säğat’ 10nan soñ uramğa çığu tıyıldı, şuna kürä külämle bäyräm çaraları oyıştırılmadı.

Angliyädä dä xalıqnı cıyıp bäyräm itmädelär. Başqala Londonda poliśiyä uramğa çıqqan az sanda keşene öylärenä kitärgä çaqırıp kisätü yasadı. Törle yortlarda yäşäwçelärneñ bergä cıyıluı tıyıldı häm, şuña, öydä patilär oyıştıru da röxsät itelmäde.

Tıyularğa qaramastan, yaqınça 300 keşelek törkem küñel açu öçen “London Eye” dip ataluçı attrakśion yanında cıyıldı. Poliśiyä alarğa monı röxsät itmäde häm quıp tarattı.



Bäyläneşle xäbärlär