Kemnärgä vakśina yasaldı?

Koronavirusqa qarşı vakśinalaştıru êşçänlege şaqtıy illärdä başlandı. Qayberläre isä zakaz birelgän preparatlarnıñ kilüen kötä.

Vakśinalaştırunı berençe bulıp başlağan däwlät Angliyä buldı. Anda älege êşçänlekkä 8nçe dekabr’dä totındılar.  

Germaniyädä täwge Kovid-19 vakśinası 26nçı dekabr’dä Xalberştadt cirlegendä qartlar yortında yäşäwçe 101 yäş’lek Êdit Kvoyzallağa yasaldı.

AQŞta vakśinanıñ berençesen 14nçe dekabr’dä N’yu-Yorktağı ber şäfqat’ tutaşına qadadılar. İldä preparatnı qullanuçılarnıñ sanı 2 millionnan arttı.

Kanadada 15nçe dekabr’dä Pfayzer-Biontex vakśinası qadala başladı.  

Rusiyä sälamätlek saqlaw ministrı Mixail Muraşko 15nçe dekabr’dä ilneñ barlıq töbäklärendä Kovid-19ğa qarşı kümäk vakśinalaştıru başlanuın belderde.

İzrail’dä Pfizer/BioNTech preparatın qadaw 20nçe dekabr’dä başlandı.

Kosta-Rika, Çili häm Meksikada vakśinalaştıruğa 24nçe dekabr’dä totındılar. Argentinada Rusiyäneñ “Sputnik V” vakśinası 29nçı dekabr’dä berençe bulup mediśina xezmätkärlärenä yasaldı.  

Venesuêla da Rusiyä preparatın alu öçen 10 million dozalıq kileşü imzaladı.

Balkannarğa kilsäk, biredä Serbiyä 24nçe dekabr’dä vakśinalaştıru başlağan berençe däwlät buldı. Anda täwge preparatnı xökümät räise Ana Brnabiçqa kerttelär.  

Kuveytta da 24nçe dekabr’dä berençe vakśinanı xökümät räise şäyex Sabax Xalid äs-Sabax yasattı. Soğud Ğaräbstanında täxet prinśı Möxämmät bin Sälman belän sälamätlek saqlaw ministrı Täwfik är-Rabia da Kovid-19 vakśinasınıñ berençe dozasın aldı.

Omman häm Baxreynda da vakśinalaştıru başlandı.

Virus barlıqqa kilgän Qıtayda isä, cirle mäğ’lümatlarğa qarağanda, 1 millionnan artıq keşe vakśina yasatqan.