Könbatışta koronavirus: soñğı sannar

Qayber Könbatış däwlätlärendä Kovid-19 belän bäyle soñğı kürsätkeçlär häm waqıyğalar

1548510
Könbatışta koronavirus: soñğı sannar

Dön’yada koronavirus arqasında ğomere özelüçelär sanı 1 million 691 meñ 942dän arttı. Kovid-19nı yoqtıruçılar isä 76 million 626 meñ, sawığuçılar – 53 million 571 meñ.

AQŞta älege çir 323 meñ 401 keşeneñ ğomeren alıp kitte. İldä koronavirus yoqtıruçılar 18 million 77 meñ bularaq terkälde. AQŞta vakśina taratu öçen cawaplı general Gustav Perna ğıynvar ayınıñ berençe atnasına qadär ştatlarğa tulayım 20 million doza cibäreläçägen belderde.  

İtaliyädä kizü säbäple ğomere özelüçelär sanı 68 meñ 447gä citte. Yoqtıruçılar 1 million 938 meñ.

Angliyädä koronavirustan ülüçelär 67 meñ 75 buldı. Kovid-19 diagnozı quyıluçılar isä 2 million 4 meñ. Xökümät räise Boris Djonson, ildä koronavirusnıñ tağın da tizräk taraluçı töre barlıqqa kilgännän soñ, London häm anıñ yänäşäsendäge çikläwlärne tağın da köçäytergä häm Yaña yılda ğailälär belän cıyılıp utırunı tıyarga qarar birüen citkerde häm xalıqnı öylärendä torırğa çaqırdı.  Başqala Londonda älege belderü säwdä üzäklärendäge ığı-zığığa kiterde, keşelär Yaña yıl öçen büläklär alıp qalırğa häm azıq-tölek zapasları buldırırğa aşıqtı.   

Franśiyädä kizüdän 60 meñ 418 keşe ülde. Virus açıqlanğannar sanı isä 2 million 460 meñgä citte.

İspaniyädä koronavirus 48 meñ 926 keşeneñ ğomeren özde. İldä yoqtıru oçraqları 1 million 817 meñ.

Braziliyädä 186 meñ 356 ğomerne özgän virus bügengä qadär 7 million 213 keşedä terkälde. Däwlät başlığı Jair Bolsonaru ilneñ yuğarı mäxkämäseneñ qayber oçraqlarda Kovid-19 vakśinasın mäcbüriläşterüne küzallawçı qararın tänqıyt’läde häm bu vakśinağa ışanmawın äytte.



Bäyläneşle xäbärlär