Aydağı berençe awıl nindi bulaçaq?
10 yıl êçendä tözeläçäk awılnıñ räsemnäre belän urtaqlaştılar
Awrupa ğaläm agentlığı Ayda yäşäyäçäk berençe astronavtlarnıñ öyläre nindi bulaçağın kürsätüçe fotolar urtaqlaştı.
NASAnıñ Artemis missiyäsendä qatnaşuçı 18 keşelek törkemdä kemnär urın alaçağı bilgele. Älege açıqlawdan soñ alarnıñ Ayda tuqtalaçaq yortları xaqında täfsille mäğ'lümat citkerelde. Saqlawçı kirpeçlärne yasaw öçen şikär onı qadär waq Ay tufrağı - regolitnı qullanu planı bar. Anı Awrupa ğaläm agentlığı kiñäşçese Êydan Kowli alğa sörä. Ul astronavtlar yäşäyäçäk śilindr formasındağı qorılmalarnıñ 10 yıl êçendä tözeläçägen belderde. Kowli bu binalarnıñ astronavtlarnı radiaśiyädän saqlarğa tiyeşlegen dä iskärtte. Öylär Aynıñ härwaqıt qoyaş nurı astında buluçı kön’yaq qotıbındağı kraterenda urnaşaçaq.
Awrupa ğaläm agentlığı ğomum mödire Yan Verner Cirneñ iyärçenendä tözeläçäk koloniyäne “Ay awılı” (Moon Village) dip atadı. “Niyätem Ayda daimi baza stanśiyäse tözü. Bu törle äğ’za däwlätlär, törle illär öçen açıq stanśiyä digän süz,”-di ul.
