Yözlärçä ir balanı urladılar

Nigeriyada qorallı törkem internet-mäktäpne bastı

1544543
Yözlärçä ir balanı urladılar

Nigeriyanıñ Katsina töbäge Kankara rayonında qorallı törkem internat-mäktäpkä höcüm itte. Annan yözlärçä ir balanı urladılar. Höcümnän soñ yaqınça 400 keşeneñ yuqqa çığuın belderälär.

Däwlät başlığı Möxämmät Buxari qorallı törkemneñ ber ğayepsez balalarğa höcüm itüen qurqaqlarça dip atadı. Anıñ äytüençä, iminlek köçläre älege törkemneñ urmanda qaçıp yatuın açıqlağan häm êläkterü öçen operaśiyä başlağan.

Katsina töbäge poliśiyä idaräse wäkile Gambo İsah operaśiyä waqıtında ber iminlek xezmätkäreneñ yaralanuın citkerde. Êzläw-qotqaru êşçänlege öçen östämä köçlär cibäreläçäk.

Şul uq waqıtta, Katsina gubernatorı Aminu Masari höcümnän soñ töbäktäge barlıq internat-mäktäplärne yabu kürsätmäse birde.

Nigeriyada soñğı waqıtlarda qorallı keşelärneñ motośikllar belän höcümnär oyıştıruı säbäple qayber töbäklärdä motośikl qullanu tıyılğan ide.



Bäyläneşle xäbärlär