Könbatış illärendä koronavirus kizüe belän bäyle soñğı räsmi mäğ'lümat

Soñğı sannar

1541478
Könbatış illärendä koronavirus kizüe belän bäyle soñğı räsmi mäğ'lümat

Dön’yada koronavirus arqasında ğomere özelüçelär sanı 1 million 550 meñ 300dän arttı. Virusnı yoqtıruçılar sanı 67 million 940 meñnän, sawığuçılar isä 47 million 25 meñnän kübräk.

Amerika Quşma Ştatlarında Kovid-19 säbäple ğomere özelüçelär sanı 290 meñ 474kä, yoqtıruçılar 15 million 370 meñ 339ğa citte. İlneñ xalıq sälamätlege idaräse citäkçese Djerom Adams äytüençä, soñğı atnalarda kizü dulqınınıñ üsä başlawı ildäge mediśina xezmätläre mömkinleklärenä tiskäre yoğıntı yasadı. Ul, şul säbäple, Kovid-19dan vakśinalaştıruda östenlekneñ mediśina xezmätkärlärenä bireläçägen belderde.

Franśiyädä koronavirus säbäple soñğı täwlektä 366 keşeneñ ğomere özelde. Kizü başınnan birle ülüçelär sanı 55 meñ 521gä citte. Kovid-19 diagnozı quyılğan keşelär sanı isä 2 million 295 meñ 908.  

İtaliyädä ülüçelär sanı 60 meñ 606ğa citte, yoqtıruçılar isä 1 million 742 meñ 557 buldı. İlneñ êçke êşlär ministrı Luçiano Lamorgezenıñ da Kovid-19 testı pozitiv çıqtı. Bu xaqta aña ministrlar kabinetı cıyılışı waqıtında belderälär. Lamorgeze utırıştan çığıp kitä häm üzbiklänügä kerä.  

İspaniyädä kizü säbäple 46 meñ 646 keşeneñ ğomere özelde, Yoqtıruçılar – 1 million 702 meñ 328.

Angliyädä Kovid-19dan ülüçelärneñ sanı 61 meñ 434kä, yoqtıruçılar isä 1 million 737 meñ 960qa citte. İldä bügen koronavirustan vakśinalaştıru başlana. Ul Angliyä tarixındağı iñ zur vakśina kampaniyäse bulaçaq. Berençe êtapta 400 meñ keşeneñ vakśinalaştırıluı maqsat itep quyıla.

Avstriyädä koronavirus 3 meñ 897 keşeneñ ğomeren özde, yoqtıru oçraqları 305 meñ 693 buldı. Kizü belän köräş maqsatınnan yaqınça 3 atna yabıq bulğan säwdä üzäkläre Yaña yıl aldınnan qabat açıldı. Moña qadär çittän torıp uqıtqan başlanğıç häm urta mäktäplär yözgä-yöz belem birügä küçte.  



Bäyläneşle xäbärlär