AQŞ belän Franśiyä üpkälägän

Alarnıñ Rusiyäneñ Tawlı Qarabaxtağı bäreleşlärne tuqtatu kileşüenä üzlären kertmäwenä êçe poşa

1531202
AQŞ belän Franśiyä üpkälägän

AQŞ häm Franśiyä Rusiyäneñ Tawlı Qarabaxta Azärbaycan belän Ärmänstan arasındağı bäreleşlärne tuqtatqan kileşügä üzlären kertmäwenä üpkälägän. Bu xaqta Rusiyä tışqı êşlär ministrı Sergey Lavrov belderde. Ul Russia Today telekanalına interv’yusında AQŞ häm Franśiyäneñ Tawlı Qarabaxtağı kileşü prośessına kertelmäwe turındağı sorawlarğa cawap birde. Bilgele bulğança, älege illär Azärbaycan belän Ärmänstan arasındağı kiyerenkelekne çişü öçen tözelgän Minsk törkemenä kerä.

Lavrov äytüençä, AQŞ häm Franśiyä kileşü öçen kiräkle şartlarnı barlıqqa kiterüdä ähämiyätle rol’ uynağan.

“Franśiyä ilbaşı Êmmanuêl’ Makronnıñ Rusiyä däwlät başlığı Vladimir Putin belän söyläşülärendä dä, amerikalı häm franśuz wazıyfadaşlarım belän Tawlı Qarabax belän bäyle söyläşülärdä dä üpkäläwläre xis itelä. Bu bik qızğanıç,”-dip söyli Lavrov.

Ul Tawlı Qarabaxta keşelärneñ üterelüen, öylären taşlap kitüen, migrant sanınıñ artuın telämäwlären Franśiyä tışqı êşlär ministrı Jan-İv Le Drian belän söyläşülärendä añlatırğa tırışuın citkerde.

Lavrov äytüençä, här minut ber keşe ğomerenä tiñ bulğan waqıtta Vaşington häm Parijğa şaltıratıp, alarğa kileşü matdälären añlatıp, aña niçek qarawların sorap, urtaq fikergä barırğa mataşu urınsız. Ul bu nisbättän Rusiyäne ğayepläwneñ äxlaqıy yaqtan döres häm êtik bulmawın assızıqlıy. Lavrov qayber däwlätlärneñ Awrupa Berlege şikelle küp’yaqlı qorılışlarda poziśiyälären köçäytü häm säyäsättä yaltıraw teläkläreneñ alğı planğa çığuınıñ bik qızğanıç buluın äytte.

Tışqı êşlär ministrı Rusiyäneñ ğamälläreneñ xalıqara cämäğat’çelek tarafınnan yaqlaw tabuına qanäğat’ qaluların belderde.



Bäyläneşle xäbärlär