Fälästinlelär yähüdlärne uzdı

Fälästin xökümäte räise Möxämmät İştiyyä tarixi Fälästin cirlärendä fälästinelelärneñ täwge tapqır yähüdlär sanın 250 meñ keşegä uzuların belderde. “İzrailneñ ike däwlätle çişeleşne yäisä demografik erüne qabul itü waqıtı citte,”-dide ul.

Tarixi Fälästingä xäzerge İzrail territoriyäse, Könçığış Qudüs, Yordannıñ Könbatış üzänlekläre, Gazzä kerä.

İştiyyä Ramallax şähärendä uzuçı xökümät cıyılışında yasağan çığışında bolay dide: “Yähüd cirläşü punktları tözü häm kiñäytü säyäsäte tınıçlıqnıñ doşmanı. Okkupant däwlät cirlärebezdäge kolonial’ häm basıp alu plannarın tuqtatırğa tiyeş”.

İştiyyä äytüençä, Yordannıñ Könbatış üzänlegendä yähüd cirläşüçelär sanı 750 meñgä citkän. Bu töbäk xalqınıñ 25%ına turı kilä.

İzrail belän Fälästin arasında solıx söyläşüläre 2014nçe yılnıñ aprelendä tuqtaldı häm, barlıq tırışlıqlarğa qaramastan, qabat başlamadı. Moña İzrailneñ 1967nçe yılğı çiklärne, cirlärennän mäcbüri küçerelgän fälästinlelärneñ kire qaytu xoquqın häm yähüd cirläşü punktların tözüne tuqtatunı qabul itmäwe säbäpçe ide.