Xamas Baydennı "Ğasır kileşüe"nnän baş tartırğa çaqırdı

Fälästinneñ qarşılıq xäräkäte Xamas AQŞta ilbaşı saylawında ciñgän Djo Baydennı “Ğasır kileşüe”nnän baş tartırğa çaqırdı. Oyışmanıñ säyäsi byurosı räise İsmail Xäniyyä yazmaça belderüendä bolay di: “Yaña saylanğan idarädän “Ğasır kileşüe” planınnan, Qudüsneñ İzrail başqalası bularaq qabul itelüe häm AQŞ ilçelegen älege şähärgä küçerü qararınnan baş tartırğa çaqırabız”.

Xäniyyä yaña ilbaşın AQŞnıñ Fälästin xalqına qarata ğadelsez säyäsäten tuqtatırğa, Vaşington idaräseneñ zolım häm doşmanlıqnıñ urtağı xälenä kitergän, region totrıqlılığın cimerüçe häm bäreleşlärne çişügä kirtä buluçı poziśiyäsen tözätergä çaqıra.

“Uzğan yıllarda Fälästin xalqı AQŞ idaräseneñ İzrail yaqlı buluı arqasında bik küp awırlıq çikte. İlbaşı Donal’d Tramp häm yarannarı fälästinlelärneñ milli xoquqların bozıp İzrailne yaqlawda çikne iñ nıq uzuçılar buldı,”-di Xamasnıñ säyäsi byurosı räise.

Xäniyyä, monnan tış, BMOnıñ fälästinle möhacirlärgä yärdäm agentlığın finanslawnıñ tuqtatıluı belän bäyle qararlarnı ğamäldän çığarırğa, Fälästin xalqınıñ ixtiyarına xörmät belän qararğa häm İzrail belän normal’läşü prośessına kerüläre öçen regiondağı däwlätlärgä basım yasawnı tuqtatırğa çaqırdı.