Kovid-19nı yötkerü tawışınnan tanıy

AQŞnıñ Massaçusets texnologiya institutı belgeçläre üzläre yasağan yasalma zihen modele belän bilgeläre bulmağan Kovid-19 oçraqların yötkerü tawışınnan añlıy.

Simptomnarı bulmağan keşelär, ğadättä, üzläreneñ awıru ikänen belmi häm test yasatmıy. Şul säbäple, üzläre dä sizmiçä xastalıqnı başqalarına yoqtıralar.

Belgeçlär asemptomatik keşelärneñ yötkerü räweşeneñ sälamät keşelärnekennän ayırıluın açıqlıy. Monı ğadäti räweştä işetep kenä añlaw mömkin tügel, şuña kürä yärdämgä yasalma zihen kilä. Anı distälägän meñ keşeneñ yötkerü tawışı häm söyläşüe nigezendä öyrätälär. Şunnan soñ yasalma zihen modele yaña yötkerü tawışları işetkäç Kovid-19 diagnozı quyılğan keşelärneñ 98,5%ın, asemptomatik xastalarnıñ isä barısın döres bilgeli.

Universitet yasap çığarğan älege model’ne Amerika azıq-tölek häm daru xezmäte raslasa, asemptomatik awırular anı tüläwsez qullana alaçaq. Monıñ öçen älege programmanı telefonğa yöklärgä yäisä binalarnıñ kerü urınına urnaştırırğa ğına kiräk bula. Näticädä cihazğa yötkerep koronavirus yoqtıruıñnı açıqlarğa mömkin.