Awrupanı mutantlar "yawlap aldı"

İkençe dulqında koronavirusnıñ mutaśiyä kiçergän töre östenlek itä

1518451
Awrupanı mutantlar "yawlap aldı"

Awrupağa bärgän yaña tör koronavirus kizüeneñ ikençe dulqını berençese belän oxşamağan. Anıñ mutaśiyä kiçergän töre buluı alğa sörelä. Bu virusnı cäy köne turistlar kiterüen sanıylar.  

Şveyśariyäneñ Bazel universitetı, Śürix federal’ texnologiya institutı häm İspaniyädäge SARS-CoV-2neñ genom êpidemiologiya proyektı “SeqCOVİD” ğalimnäreneñ tikşerenüläre dä şunı kürsätä: Awrupadağı ikençe dulqında mutant virus xakimlek itä. Ul täwge tapqır iyün’ ayında terkälgän dip sanala. Mutant İspaniyäneñ tön’yaq-könçığışındağı ferma xezmätkärläreneñ awıru oçraqlarında kürenä. Soñınnan ul turistlar häm başqa säyäxätçelär yärdämendä çit illärgä tarala.

Mutant koronavirus variantına “20A.EU1”iseme birelä.  İyül’ ayı axırında anıñ kimendä 6 Awrupa ilenä taraluı bilgele. Oktyabr’dä isä qıytğadağı 12 däwlättän tış, Gonkong häm Yaña Zelandiyädä dä terkälde.

Ğalimnär bu variantnıñ tağın da ülemçel buluı turında mäğ’lümatlarğa iyä tügel. Ämma anıñ SARS-CoV-2dän tağın da yoğışlı ikäne farazlana.

Awrupada koronavirusnıñ yözlärçä variantı barlığı, ämma bik azınıñ 20A.EU1 qadär kiñ taraluı belderelä.  “20A.EU1 variantı belän 20A.EU2 dip ataluçı tağın ber variant Awrupadağı ikençe dulqında östenlek itä,”-di ğalimnär. Alar İspaniyädäge oçraqlarnıñ 80%ınıñ, Angliyädäge här 5 yaña oçraqnıñ kimendä 4eneñ älege variantqa bäyle buluın belderä.



Bäyläneşle xäbärlär