“Tawlı Qarabax xalqı bolay da bik küp mixnät çikte"

Djozef Borrell Azärbaycan belän Ärmänstannı utnı tuqtatu kileşüen bozmasqa çaqırdı

1511502
“Tawlı Qarabax xalqı bolay da bik küp mixnät çikte"

Awrupa Berlege tışqı mönäsäbätlär häm iminlek säyäsäte yuğarı wäkile Djozef Borrell Azärbaycan belän Ärmänstannan utnı tuqtatu kileşüen bozmawların soradı.

Ul Tawlı Qarabaxtağı wäzğıyät’ belän bäyle yazmaça belderüdä ike däwlät arasında monnan aldağı töndä ğamälgä kergän utnı tuqtatu uñayınnan qanäğat’ buluın äytte. Ämma bu kileşüneñ bozıluı anı borçuğa sala. Borrell bäreleşlär arqasında tınıç xalıqnıñ zarar kürüen assızıqladı.

“Tawlı Qarabax xalqı bolay da bik küp mixnät çikte. Bäreleşlär kiñ külämle häm qabul itü mömkin bulmağan yuğaltularğa kiterde. Awrupa Berlege, çığışı nindi genä bulsa da, bu tör höcümnärgä qarşı,”-dide Borrell. Ul üzeneñ Azärbaycan tışqı êşläre ministrı Cäyxun Bayramov häm Ärmänstan tışqı êşlär ministrı Zorab Mnatsakanyan belän telefonnan söyläşüen äytte. Wäkil äñgämädä utnı tuqtatunıñ şartsız häm nıqlı räweştä ğamälgä aşırılu kiräklegen assızıqlağan. “Monnan tış, tınıç xalıqqa höcümnärne kiçekmästän tuqtatırğa quştım. Bu tördäge höcümnärneñ xaqlısı bulırğa mömkin tügel,”-di ul.
Borrell bäreleşlärne tuqtatu öçen çişeleş êzläwdä ike yaqqa da yärdäm itärgä xäzer buluın citkerde.



Bäyläneşle xäbärlär