Migrant deputat buldı

Cıyıştıruçı bulıp êşläwçe Afrikalı qaçaq Yaña Zelandiyada parlamentqa saylandı

1511883
Migrant deputat buldı

Yaña Zelandiyädä uzğan atna axırında ütkän ğomumi saylawlarda Êşçe partiyäsennän kandidat itep çığarılğan êlekkege migrant, Êritriyadan kilgän İbrahim Ömär qatnaşa. Häm ciñä. Ul Yaña Zelandiyädä xäzer berençe Afrika çığışlı deputat.

Cirle matbuğatta Ömärneñ älege ildäge tormışın uram seberüçe bularaq başlawı, awır şartlarda yäşäwe turında yazalar. Xäbärdä äytelgänçä, Ömär berençe Afrika çığışlı deputat bulunıñ zur östenlek ikänen belderä. Ul älege wazıyfada bulğanda tübän xezmät xaqına köç tügüçe êşçelärneñ problemaları häm rasaçılıq mäs’äläsen kütäräçägen, Yaña Zelandiyada här watandaşnıñ berdäy forsatlarğa iyä buluı öçen tırışaçağın söyli.

Ömär 2003nçe yılda tuğan ilennän qaçıp Sudanğa sıyına. BMO lager’larında tärcemäçe bularaq êşlägän waqıtta şımçılıqta ğayeplänep saq astına alına. BMO yärdäme belän anı irekkä cibärälär. Ömärgä şunnan soñ Yaña Zelandiyägä kitü forsatı çığa. 2008nçe yılda ul başqala Vellingtonğa kilep urnaşa.

2014nçe yılda İbrahim Ömärneñ küptänge xıyalı tormışqa aşa – ul Viktoriya universitetında yuğarı belem ala başlıy. Tönlä şul uq uqu yortında çistalıq saqlawçı bularaq êşli.  

Ömär bik küp ictimağıy oyışmalarnıñ idaräsendä urın ala. Anı üze yaqlağan Êşçe partiyäsennän sawlawlarda kandidat itep kürsätälär. Afrikalı migrant anda 49% tawış cıya häm partiyäneñ parlamenttağı 64 känäfiyeneñ bersenä utıra.



Bäyläneşle xäbärlär