Naval'nıy kiyemnären taläp itä

Rusiyä oppoziśionerı Aleksey Naval’nıy xastanägä kiterelgändä östendä bulğan kiyemnärneñ üzenä birelüen teli. Xäzerge waqıtta ul Berlinda däwalana.

Naval’nıy şäxsi bloğında yazma belän urtaqlaştı. Ul ağulanıp Omskidağı xastaxanägä kiterelgän könnän soñ ber ay kiçüen belderä. “Franśiyä häm Şveśiyädäge ike bäysez laboratoriyä tänemneñ êçendä dä, tışında da Noviçoknıñ barlığın rasladı,”-dide oppoziśiyä liderı.

Naval’nıy älege mäs’äläne Rusiyädä şow xälenä kiterülären äytä.  “Qayçaq mine berkemneñ dä ağulamawın belderälär, ikençe waqıt könbatış küzläw oyışmalarınıñ mine ağulawın söylilär. Rusiyädä äle mäxkämä tikşerüe açılmadı, ämma xastaxanägä kiterelüem belän bäyle tikşerü alıp barıla,”-dip yaza ul.  Oppoziśioner älege tikşerüdän soñ 30 kön ütüen häm ağulanğanda östendä bulğan kiyemnären kire alırğa xaqı buluın belderä. “Däwalanu öçen Germaniyägä cibärer aldınnan mine anadan tuma çişenderdelär. Noviçok matdäse, möğayen, kiyemnärem aşa kertelde. Şul säbäple, ağulanğanda östemdä bulğan kiyemnär ähämiyätle dälillär ide,”-di ul.

İsegezgä töşeräbez, Aleksey Naval’nıy 20nçe avgustta Rusiyäneñ Tomsk şähärennän Mäskäwgä baru öçen oçqıçqa utıra. Oçış waqıtında anıñ xäle naçarayğannan soñ, Omsk şähärendä töşep utırırğa mäcbür bulalar. Anda Naval’nıynı xastaxanägä iltälär häm çäyenä salınğan matdä belän ağulanuın farazlıylar.

22nçe avgustta Naval’nıy şäxsi oçqıç belän Omskidan Berlindağı  Şarite xastaxanäsenä kiterelä.

Germaniyä xökümäte süzçese Şteffen Zaybert 2nçe sentyabr’dä Naval’nıynıñ Noviçok törkemenä kerüçe ximik matdä belän ağulanuın açıqlawların citkerde.  Monı soñınnan Franśiyä häm Şveśiyädäge ike bäysez laboratoriyä dä rasladı.

Naval’nıynıñ törkeme Tömski şähärendä oppoziśioner tuqtalğan qunaqxanä nomerındağı su şeşäsendä dä Noviçok êzläre tabıluın alğa sörä.