Naval'nıynıñ ağulanuın tağın 2 laboratoriya rasladı

Germaniyä xökümäte rus oppoziśionerı Aleksey Naval’nıynıñ ağulanuın tağın ike ayırım bäysez laboratoriyä raslawın citkerde.

Xökümät wäkile Şteffen Zaybert beldergänçä, Naval’nıydan alınğan ürnäklärgä Franśiyä häm Şveśiyädä toksikologik testlar uzdırılğan. İke ilneñ laboratoriyäse dä ağulanu oçrağın raslağan.  

Zaybert bu waqıyğanıñ Ximik qorallar kileşüen citdi räweştä bozunı añlatuın assızıqladı. Şuna kürä Germaniyä xökümäte Naval’nıy tikşerüendäge dälillärne analizlawğa Ximik qorallarnı tıyu oyışmasın da kertä. Alar inde oppoziśionerdan ürnäklär alıp tikşerü êşen başlağan.

Zaybert Rusiyäne qabat Naval’nıynı ağulaw waqıyğasın açıqlarğa çaqırdı.

İsegezgä töşeräbez, Naval’nıy 20nçe avgustta Rusiyäneñ Tomsk şähärennän Mäskäwgä baru öçen oçqıçqa utıra. Oçış waqıtında anıñ xäle naçarlana. Oçqıç Omsk şähärenä töşep utırırğa mäcbür bula. Naval’nıynı şähär xastaxanäsenä iltälär. Anıñ çäyenä ağulı matdä salınuı alğa sörelde.  

44 yäş’lek Naval’nıynı 22nçe avgustta Omskidan şäxsi oçqıç belän Germaniyäneñ başqalası Berlindağı xastaxanägä alıp kitälär. Tabiblar 7nçe sentyabr’dä awırunıñ xäle yaxşıruın häm komadan çığarıluın citkerde.  

Germaniyä xökümäte süzçese Şteffen Zaybert 2nçe sentyabr’dä Naval’nıynıñ nerv sistemasına täêsir itüçe Noviçok törkemendäge ximik matdä belän ağulanuı açıqlanuın äytte.

Naval’nıy Rusiyädäge korrupśiyägä qarşı köräşe belän tanıldı. Kreml’ idaräsenä rizasızlıq belderüçe mitinglar oyıştıruı säbäple yış qına törmä cäzası aldı.