Yıl sayın 5-6 yaña pandemiyä çığarğa mömkin

Ğalimnärneñ BMO sammitı öçen xäzerlägän tikşerenü näticäläre - qurqınıç

1482114
Yıl sayın 5-6 yaña pandemiyä çığarğa mömkin

Ğalimnär urmannarnıñ zur tizlek belän yuqqa çığarıluı häm biotörlelekneñ kimüe näticäsendä yaña ülemçel pandemiyälärneñ barlıqqa kiläçäge turında kisätä.

Angliyäneñ “The Observer” gazetı xäbärenä qarağanda, ğalimnär bu yanaw xaqında kiläse ayda AQŞnıñ N’yu-York şähärendä uzaçaq BMO sammitında dön’ya liderlarına citkeräçäk. Alar qorı süz genä tügel, tabiğat’ne yuq itüneñ koronavirus şikelle yaña kizülär belän turıdan-turı bäyle buluı xaqında dälillär kiteräçäk.

Urmannarnıñ zur tizlek belän yuq itelüe, awıl xucalığı mäydannarınıñ kontrol’sez räweştä kiñäytelüe, yıraq cirleklärgä şaxtalar qorıluı, qırğıy xaywannarnıñ azıq, däwa xäzerläw öçen qullanıluları häm yort xaywanı bularaq iregennän mäxrüm itelüe – xastalıqlarnıñ qırğıy tormıştan keşelärgä turıdan-turı küçüe öçen ideal’ cirlek xäzerli.

Yaña kilep çıqqan çirlärneñ yaqınça öçtän bereneñ tufraq mäydannarın qullanudağı üzgäreşlär belän bäyle buluı farazlana. Belgeçlär näticädä här yıl böten dön’ya xalqına täêsir itäçäk 5-6 yaña pandemiyäneñ çığa aluın citkerä.

Yıl sayın pal’ma ağaçı utırtu, fermalar tözü, neft’ çığaru häm qazılma baylıqlarğa ireşü öçen distälägän million gektar tropik urman häm tabiğıy yäşäw mäydannarı bul’dozerlar belän yuq itelä. Bu isä älegä fänni bularaq açıqlanmağan xisapsız virus häm bakteriyä yäşäwçe üsemlek dön’yasın beterä. Älege mikroblar başqa yäşäw cirlekläre êzläp keşelär häm xaywannarğa kerep urnaşa häm yaña çir barlıqqa kiterä.



Bäyläneşle xäbärlär