Terrorçı Tarrant ğomerlek törmägä xökem itelde

Yaña Zelandiyäneñ Kraystçerç şähärendäge 2 mäçetkä yasağan höcümdä 51 keşene ütergän, 49ın yaralağan terrorçı Brenton Tarrant ğomerlek törmägä xökem itelde. Qararnı Yuğarı mäxkämädä sud’ya Kêmeron Mander uqıdı. Ul Tarrantnıñ 51 üterü, 40 üterügä omtılış häm 1 terrorçılıq oçraqları buyınça ğayeple dip tabıluın citkerde. Anıñ şartlı räweştä irekkä çığu xoquqı bulmayaçaq.

Tarrant kiçäge utırışta üz yaqlawın uqımasqa buldı. Anıñ urınına monı advokat başqardı. Bilgele bulğança, ul barlıq ğayepläwlärne qabul itte.

Terrorçı Tarrantqa bilgelängän ğomerlek törmä – Yaña Zelandiyä tarixında xäzergä qadär birelgän iñ awır cäza. Bu qarardan qorbannarnıñ yaqınnarı häm älege waqıyğada yaralanğannar qanäğat’. Xökümäte räise Jasinda Ardern da ğadellekneñ yuandıruçı buluın belderde: “Bu Yaña Zelandiyädä älegä qadär kürelmägän cinayät’ ide. Cawap bularaq moña qadär kürelmägän cäza birelde,”-dide ul.

Yaña Zelandiya tışqı êşlär ministrı Uinston Peters ildäge möselmannarnıñ citärlek xäsrät çigüen belderep: “Terrorçınıñ üzen citeştergän ilgä cibärelüe kiräklegen uylıybız,”-dide. Petersnıñ älege süzlärennän soñ Avstraliyä xökümäte räise Skott Morrison başqala Kanberrada belderü yasadı häm Avstraliyäneñ aq ıruğnıñ östenlegen yaqlawçı terrorçını tuğan ilenä tapşıru mäs’äläsendä bernindi taläp yasamawın äytte.