İzrail belän tınıçlıq kileşüe tözelde

Amerika Quşma Ştatları däwlät başlığı Donal’d Tramp İzrail belän Berläşkän Ğaräp Ämirlekläreneñ mönäsäbätlärne cayğa salu öçen kileşü imzalawın citkerde.

Tramp Twitterda bolay dip yazdı: “İke iskitkeç dustıbız İzrail häm Berläşkän Ğaräp Ämirlekläre arasında tarixi tınıçlıq kileşüe.”

Tramp kileşü belän bäyle urtaq açıqlawnı da urtaqlaştı.

Açıqlawda älege kileşüneñ Yaqın Könçığışta tınıçlıqnı arttıraçağı häm töbäktä zur potenŝial öçen yul açaçağı däğwa itelä.

Açıqlawğa kürä kiläse atnalarda İzrail häm Berläşkän Ğaräp Ämirlekläre räsmi zatları küreşep, investiŝiya, turizm, mädäniyät, turıdan oçqıç säfärläre, iminlek, telekommunikaŝiya, texnologiya,ênergetika, sälamätlek saqlaw, tirä-yaq moxitnı saqlaw, ike yaqlı bularaq ilçeleklärneñ açıluı mäs’älälärendä kileşülär töziyäçäk.

İzrail prem’yer-ministrı Binyamin Netanyaxu isä ile belän Berläşkän Ğaräp Ämirlekläre arasında tözelgän cayğa salu kileşüen tarixi adım itep taswirladı.

Berläşkän Ğaräp Ämirlekläre 1979 yılda Misırnıñ, 1994tä Yordaniyadän soñ İzrail belän tınıçlıq kileşüen imzalağan 3nçe ğaräp ile buldı.