Bizgäk parazitı mutaśiyä kiçergän

Afrika däwläte Ruandada ğalimnär bizgäk kiterep çığaruçı parazitlarnıñ ber töreneñ älege awırunı däwalawda qullanıluçı artemiśinin matdäsenä qarşı çıdam buluın açıqladı.  Tikşerenüne Senegaldağı Paster institutı häm Ruanda biomediśina üzägeneñ malyariyanı kontrol’dä totu programması belgeçläre ütkärde. Alar bizgäk xastalarınnan alınğan qan ürnäklären centekläp analizladı.

Tikşerenü kürsätkänçä, 257 awırunıñ 19ınıñ qanındağı parazit mutaśiyä kiçergän häm qıytğada bizgäktän däwalawda qullanıluçı daruğa qarşı çıdamlılıq barlıqqa kilgän.

Dön’yadağı här 10 malyariyä oçrağınıñ 9ı Afrikağa turı kilä. Belgeçlär täwge tapqır artemiśinğa qarşı tora aluçı parazit barlığın açıqladı. Alar monıñ qıytğa xalqı sälamätlegenä citdi yanaw buluın uylıy.

Ğalimnär bizgäkkä qarşı monnan alda qullanılğan darularğa çıdamlılıq kürsätkän parazitlarnıñ 1980nçe yıllarda millionnarça balanıñ ülemenä kiterüen xäterlätte.

2018nçe yılda bizgäk kiterep çığarğan 400 meñnän artıq ülemneñ 90%ınnan artığı Afrikada terkälde.