Däwlät binalarına zarar birüçelärgä - 10 yıl törmä
Donal'd Tramp rizasızlıq çaralarında qatnaşuçılarnı kisätte
AQŞ ilbaşı Donal’d Tramp ildä rasaçılıq häm poliśiyägä qarşı rizasızlıq çaralarında federal’ binalarğa zarar birüçelärgä kimendä 10 yıl törmä yanawın belderep “Monı êşlämägez” dide. Üzeneñ Twitter bitendä ul demonstraśiyälärneñ köç qullanuğa äwerelüen häm däwlät milken cimerülärgä kiterüen tänqıyt’läde.
Tramp Oregon ştatına bäyle Portlend şähärendä demonstrantlarnıñ federal’ mäxkämä binasına ut törtüen xäterlätte. “Teläsä qaysı däwlät binasına vandallıq qılğan yäisä zarar birgän anarxistlar, provokatorlar yäisä protest yasawçılar soñğı waqıtta raslanğan “Häykällär häm memoriallar qanunı” qısalarında xökem iteläçäk,”-dide ul. Tramp älege keşelärgä 10 yıl törmä yanawın da äytergä onıtmadı.
AQŞnıñ Minnesota ştatında afroamerikalı Djordj Floydnıñ 25nçe mayda poliśiyä zolımı näticäsendä ülüennän soñ bik küp şähärdä rizasızlıq çaraları oyıştırıldı. Qayber zur qalalarda ul köç qullanuçı çualışlarğa äwerelde.
