1 trillion 800 milliard yevroda kileştelär

Awrupa Berlegendäge 27 däwlätneñ liderı koronavirusnıñ iq’tisadi näticäläre belän köräş öçen 750 milliard yevrolıq qotqaru programması häm kiläçäk öçen 1 trillion yevrodan artıq byudjet mäs’äläsendä kileşte.

Awrupa Berlege şurası räise Çarl’z Mişel’ häm komissiyä räise Ursula fon der Leyen Bel’giyä başqalası Brüssel’dä uzğan AB liderları sammitınnan soñ matbuğat oçraşuı oyıştırdı.

“İreştek. Qotqaru paketı häm byudjet mäs’äläsendä kileşü täêmin ittek. Monnan soñğı 7 yıllıq byudjet 1 trillion 74 milliard yevro bulaçaq. Qotqaru paketına 750 milliard yevro bülenäçäk,”-dip söyläde Mişel’. Ul comğa könnennän birle bik awır söyläşülär baruın belderde. Anıñ äytüençä, Awrupa tarixında berençe tapqır byudjet açıq räweştä klimat maqsatlarına bäylände.

AB komissiyäse räise Fon der Leyen byudjet häm qotqaru programması mäs’äläsendä kileşülären belderep: “Bu – Awrupa östenleklärenä turı kilüçe tulayım 1 trillion 800 milliard yevro külämendäge moñarçı kürelmägän paket,”-dide.

Ul söyläşülärneñ 4 kön häm 4 tön däwam itüen xäterlätte. “Awrupa öçen tarixi mizgel. Äğ’za 27 däwlät ber-bersenä tayandı häm paketnı qabul itte,”-dide komissiyä räise.

Kiläse êtapta qotqaru paketı häm byudjet mäs’äläse Awrupa Berlege parlamentında qarala başlayaçaq.