AQŞ TikToknı yabarğa niyätli

Anıñ şäxsi mäğ’lümatlarnı Qıtay idaräsenä citkerüe söylänä

1451031
AQŞ TikToknı yabarğa niyätli

AQŞ däwlät särqatibe Mayk Pompeo, TikToknı da kertep, Qıtay sośial’ media programmaların tıyarğa planlaştıruların belderde. Ul “Fox News” kanalına interv’yusında älege programmalarnıñ qurqınıçsızlıq yağınnan zur borçu tudıruı turındağı bäxäslärne xäterlätte häm bu mäs’älägä citdi qarawların äytte.

“Min ilbaşı Donal’d Tramptan alda qarar birä almıym, ämma AQŞ keşelärneñ telefonnarına quyılğan Qıtay programmalarına qağılışlı kiräk bulğannı êşlär. Xäzerge waqıtta mäs’äläne qarıybız,”-dide Pompeo.

TikTok mäs’älä belän bäyle belderü yasap, räsmi zatnıñ süzlärenä rizasızlıq kürsätte. Anda şirkätneñ amerikalı menedjer tarafınnan idarä itelüe häm iminlek, däwlät säyäsäte nisbätennän berençe urınnarda buluı äytelä.  “Qullanuçılarıbızğa ışanıçlı programma täq’dim itüdän dä ähämiyätle östenlegebez yuq. Qıtay xökümätenä berqayçan mäğ’lümat birmädek, sorasalar da monı êşlämäyäçäkbez,”-diyelä belderüdä.

TikTok dön’yada 800 million aktiv qullanuçığa iyä. Anıñ şäxsi mäğ’lümatlarnı Qıtay idaräsenä citkerüe söylänä. Bik küp AQŞ belgeçe şirkätneñ milli iminlekkä yanaw barlıqqa kiterüe fikerendä.



Bäyläneşle xäbärlär