AQŞ Bötendön’ya sälamätlek saqlaw oyışmasınnan çığuın belderde

AQŞta Donal’d Tramp idaräse Bötendön’ya sälamätlek saqlaw oyışmasınnan räsmi räweştä çığuı xaqında Kongressqa belderde.

N’yu-Djersi senatorı häm tışqı mönäsäbätlär komitetı räise Bob Menendez Twitterda bolay dip yazdı: “Pandemiyä urtasında Kongress ilbaşı Donal’d Tramptan Bötendön’ya sälamätlek saqlaw oyışmasınnan çığuı turında belderü aldı”. Ul Tramp idaräseneñ bu adımı Amerikanı “xasta häm yalğız” qaldıraçaq dip ışana.

Aq Yorttan ber wäqalätle räsmi ayırılunıñ düşämbedän ğamälgä kerüen häm bu xaqta BMO ğomum särqatibe Antonio Guterrişqa räsmi bularaq citkerelüen äytä. BMO isä bu êşlärneñ alay tiz genä bulmayaçağın, 1 yıl däwam itäçägen belderde. Çönki ayırılu qararı xaqında 1 yıl aldan äytü kiräk. BMO ğomum särqatibe wäkile Stefan Duyarriç añlatqança, AQŞ oyışmadan çıqqançı başta burıçların tülärgä häm finans yöklämälären cirenä citkerergä tiyeş.

Tramp 14nçe aprel’dä Bötendön’ya sälamätlek saqlaw oyışmasın Kovid-19 belän köräştä uñışsız buluda häm Qıtayğa yaqın toruda ğayepläde, oyışmağa finans yärdämen tuqtatuların belderde.