Koronavirus rekord yasadı

Kiçä yoqtıruçılar sanı rekord däräcädä arttı

1441436
Koronavirus rekord yasadı

Kiçä dön’ya külämendä yaña diagnoz quyıluçılar sanı rekord däräcädä artqan -  ber köndä 183 meñnän artıq oçraq terkälgän. Bötendön’ya sälamätlek saqlaw oyışması yanawnıñ äle uzmawın häm virusnıñ haman ülemçel buluın  belderde. Ğomum direktor Tedros Adxanom Gebreyesus äytkänçä: “Här kön diyärlek yaña häm qurqınıç rekord yasıybız”. Ul videokonferenśyä yulı belän matbuğat cıyılışı ütkärde.

Gebreyesus kiçäge 183 meñlek artunıñ moña qadär ber köndä terkälgän iñ zur yoqtıru oçrağı kürsätkeçe buluına iğ’tibarnı cälep itte. Ul oyışmağa tulayım 8 million 800 meñnän artıq yoqtıru oçrağı häm 465 meñnän kübräk Kovid-19 belän bäyle ülem xaqında xisap birelüen äytte. “Qayber illärdä yoqtıru häm ülem sanında tiz artu däwam itä,”-dide ğomum direktor.  

Gebreyesus küp däwlätlärneñ uñışlı räweştä virusnı kontrol’gä aluların häm şunnan soñ tıyularnı beterüen, monıñ belän bergä yoqtıru oçraqlarınıñ qabat kübäyä bapşawın da assızıqladı.

“Barlıq illär dä üz xalqın saqlaw häm sośial’- iq’tisadi zararnı kimetü arasında neçkä balansnı saqlarğa omtıla. Bu tormış häm yäşäw çığanaqları arasında saylaw tügel. İllär ikesen dä ber ük waqıtta başqara ala,”-dip söyläde Gebreyesus.

Soñğı könnärdä qayber ğalimnär virusnıñ köçen yuğaltuı turında belderü yasadı. Yoqtıru oçraqları rekord yasasa da, ülem däräcäse yuğarı tügel. Bu xaqtağı sorawğa Bötendön’ya sälamätlek saqlaw oyışmasınıñ Kovid-19ğa qarşı köräş törkeme liderı Mariya Van Kerxove cawap birde. Ul virustağı üzgäreşlärne açıqlaw öçen belgeçlärneñ tikşerenü alıp baruın söyläde.



Bäyläneşle xäbärlär