İke Koreyanıñ arasınnan qara mäçe ütte

Kiçä Tön’yaq Koreya 2018nçe yıldan birle täwge tapqır Kön’yaq Koreyanıñ şaltıratuına cawap birmäde

1432307
İke Koreyanıñ arasınnan qara mäçe ütte

Kön’yaq Koreya aktivistlarınıñ  Tön’yaq Koreyağa broşyuralar cibärüennän soñ ike arada kiyerenkelek tuğan ide. Xäzer isä ike kürşe däwlät arasında barlıq êlemtä kanalları özelergä tora.

Tön’yaq Koreya räsmi xäbär agentlığı KCNA yazğança, Pxen’yan idaräse bügen Kon’yaq Koreya belän barlıq çik ar’yağı êlemtä çıbıqların özäçäk.

“Kön’yaq Koreya räsmiläre naçar sıltawlar belän citdi cawaplılıqtan taypılırğa tırıştı, beräwläreneñ Tön’yaq Koreyağa qılğan doşmannarça ğamälenä küz yomdı. Monıñ öçen cawap biräçäklär,”-diyelä xäbärdä.

Qararnı Tön’yaq Koreya liderı Kim Çen Innıñ señlese Kim Yo Çjon häm êlekkege küzläw oyışması citäkçese Kim Yon Çxol’ çığaruı da belderelä. Sonğısı, Seul idaräse fikerençä, 2010nçı yılda 50 Kön’yaq Koreya keşeseneñ ülemenä kitergän höcümneñ arqasında toruçı isem.  

Kön’yaq Koreya xökümäte älegä Tön’yaq kürşeseneñ qararına bäyle belderü yasamadı.

İke däwlät arasında êlemtä byurosı aradaşçılığı belän här könne ike telefon söyläşüe bula ide: cirle waqıt belän irtänge säğat’ 9da häm kiçke 5tä. Kiçä Tön’yaq Koreya 2018nçe yıldan birle täwge tapqır Kön’yaq Koreyanıñ şaltıratuına cawap birmäde.



Bäyläneşle xäbärlär