İtaliya çiklären aça, Franśiyä - kafe häm restorannarın

Dön’yada koronavirustan ülüçelär sanı 377 meñnän arttı. Yoqtıru oçraqları 6 million 373 meñ, sawığuçılar – 2 million 909 meñ.

Kizüneñ Awrupadağı üzäge Angliyädä Kovid-19 säbäple ülüçelär soñğı täwlektä 111gä arttı häm 39 meñ 45kä citte. Şul uq waqıtta 1570 yaña yoqtıru oçrağı terkälde. Monıñ belän bergä virus êläkterüçelär sanı ildä 276 meñ 332 buldı.

İtaliyädä koronavirus sonğı täwlektä tağın 60 keşeneñ ğomeren aldı. İldä kizü başınnan birle koronavirustan 33 meñ 475 keşe ülde. Kovid-19 yoqtıruçılar sanı isä 233 meñ 197. Aktiv oçraq 708gä kimede häm 41 meñ 367 buldı. İtaliyä irtägä çiklären Awrupa berlege illäre öçen açarğa äzerlänä.

Franśiyädä kizü arqasında soñğı täwlektä xastaxanälärdä 31 keşeneñ ğomere özelde. Şulay itep, tulayım yuğaltu 28 meñ 833kä citte. Virus yoqtıruçılar isä 338gä arttı häm 226 meñ 831 keşe buldı. Franśiyädä Kovid-19 çaraların yomşartunıñ ikençe êtabı qısalarında bügen kafe, bar, restorannar qabat açıla. Ämma başqala Parij kergän İl’-de-Frans töbägendä kafe häm restorannarnıñ barı tik açıq mäydannarı qullanıluına röxsät birelä. Parij tışındağı şähärlärdä basseyn, sport zalları häm teatrlar qabat açıla. Kinoteatrlar 11nçe iyün’nän xezmät kürsätä başlayaçaq.  

İspaniyä sälamätlek saqlaw ministrlığı soñğı 24 säğat’tä koronavirustan ülüçe bulmawın häm yaña 71 yoqtıru oçrağı terkälüen citkerde. İldä soñğı ber atnada 35 keşe Kovid-19 säbäple ülgän ide. İspaniyädä kizü iñ yuğarı noqtasına citkän waqıt - 2nçe aprel’dä ber köndä 950 keşe ülde häm yoqtıru oçraqları täwlektä 8 meñnän kübräk ide.

Kanadada Kovid-19 säbäple ğomere özelüçelär sanı soñğı täwlektä 244kä arttı häm 7 meñ 380 keşe täşkil itte. Yoqtıru oçraqları isä 2 meñ 275kä kübäyde häm 92 meñ 465kä citte.

Braziliyädä Kovid-19 säbäple soñğı täwlektä 623 keşe ülde. İldä kizü başınnan birle älege diagnoz quyılğan 29 meñ 937 keşeneñ ğomere özelde. Yoqtıru oçraqları – 526 meñ 447.

Meksikada koronavirus 10 meñ 167 keşeneñ ğomeren aldı. Yoqtıru oçraqları – 93 meñ 435.