Êverestnı ülçäwçelär öskä menep citte

Dön’yadağı iñ yuğarı noqta Êverest tawınıñ biyeklegen ülçäwçe Qıtay êkspediśiyäse öskä menep citte. Alar 7nçe mayda yuğla çıqqan ide.

30 keşelek törkemdä Qıtay tabiğıy çığanaqlar ministrlığınıñ ülçäw belgeçläre häm al’pinistlar bar. Alar Nepal belän ike aradağı tawğa menüne Qıtay tarafındağı töp lager’dan başladı.

Törkem yasalma iyärçennärdän kilgän GPS signalları belän gravimetr şikelle aparatlar yärdämendä tawnıñ iñ yuğarı noqtasınıñ biyeklegeneñ tögäl ülçämen alırğa tırışaçaq.  Monnan tış, alar faydalı qazılmalar êzläw öçen dä êşçänlek alıp baraçaq.

Qıtay 1975nçe häm 2005nçe yıllarda da ülçäw öçen Êverestqa fänni êkspediśiyä cibärgän ide. 1975nçe yılda tawnıñ biyeklege 8848 metr 13 santimetr bulsa, 2005tä bu kürsätkeç 8844 metr 43 santimetr bularaq terkälä.