Fälästin yärdämne qabul itmäde

Berläşkän Ğaräp Ämirlekläre alarğa koronavirus belän köräş öçen mediśina kiräk-yaraqları cibärgän ide

1421401
Fälästin yärdämne qabul itmäde

Fälästin idaräse Berläşkän Ğaräp Ämirlekläreneñ koronavirus belän köräş öçen İzrail aşa cibärgän yärdämen qabul itmäde.

“Berläşkän Ğaräp Ämirlekläreneñ mediśina kiräk-yaraqları cibärüe nisbätennän bezneñ belän bernindi koordinaśiyä yasalmadı. Tulısınça bezneñ belän xisaplaşmıyça kilgän bu yärdämnärne kire qağabız,”-dide Fälästin sälamätlek saqlaw ministrı Mey Keyle. Ul Fälästinneñ ayırım däwlät buluın assızıqladı häm il belän bäyle här närsäneñ xakimiyät belän kiñäşläşep êşlänergä tiyeşlegen äytte.

Şul uq waqıtta, isemen belderergä telämägän fälästinle başqa ber zattan alınğan mäğ’lümatlarğa qarağanda, Berläşkän Ğaräp Ämirlekläre älege mediśina yärdämen BMOnıñ Yaqın Könçığış tınıçlıq prośessı maxsus koordinatorı Nikolay Mladenov belän söyläşep İzrailgä cibärgän. Abu-Dabi Fälästin idaräse belän bernindi koordinaśiyä täêmin itmägän.  

“Bu mediśina yärdäme ısulı ğaräp dön’yasınıñ İzrail belän aralarnı tözätü prośessı qısalarında êşlände, bez anı kire qağabız,”-dide fälästinle çığanaq.

Berläşkän Ğaräp Ämirlekläreneñ “Etihad Airways” hawa yulı şirkäte Fälästingä Kovid-19 belän köräştä yärdäm maqsatı belän cibärelgän mediśina kiräk-yaraqların iltü öçen Abu-Dabi belän diplomatik mönäsäbätläre bulmağan İzrailgä täwge tapqır säfär yasadı. Oçqıç Tel’-Aviv yänäşäsendäge Ben Gurion aêroportına töşep utırdı.



Bäyläneşle xäbärlär