Asteroid Cirgä yaqınlaşa

Qoyaş sistemasındağı gigant asteroid Cirneñ yanınnan ütep kitäçäk.

Space.com internet säxifäsendä urın alğan xäbärgä qarağanda, 1998 OR2 iseme birelgän 2 çaqrım 400 metr diametrlı kük ciseme bezneñ planetağa 6,3 million kilometr yaqınnan uzaçaq. Anıñ Cirgä bärelü qurqınıçı yuq. Çönki planetabızğa iñ yaqınlaşqan mizgeldä dä ul Ayğa qarağanda 16 tapqır yırağraq bulaçaq.

Amerikanıñ Gavayi ştatındağı Haleakala observatoriyäse astronomnarı tarafınnan 1998nçe yılnıñ 24nçe iyülendä açılğan älege kük ciseme bügengä qadär bilgele bulğan iñ yaqtı häm zur asteroidlarnıñ berse.