Amerikada Kovid-19dan ülemnär V’yetnam suğışınıqınnan arttı

könbatış illärendä koronavirus belän bäyle soñğı sannar

1407567
Amerikada Kovid-19dan ülemnär V’yetnam suğışınıqınnan arttı

Dön’yada yaña tör koronavirus säbäple ülüçelärneñ sanı 218 meñ 100dän arttı, yoqtıru oçraqları isä 3 million 146 meñ 200. Bu çirne ciñüçelär – 962 meñnän kübräk.

Kizüneñ märkäze xälendäge Amerika Quşma Ştatlarında ğomere özelüçelär sanı 59 meñ 200dän arttı. İldä Kovid-19 belän bäyle ülemnär V’yetnam suğışındağı yuğaltularnı uzıp kitte. Yoqtıru oçraqları isä ber million tiräse. İlbaşı Donal’d Tramp aldağı çorda tağın da kübräk yoqtıruçı açıqlanaçağın, çönki test yasawnı arttıraçaqların belderde. AQŞta 566 meksikalı migrantnıñ da koronavirustan ülüen äyttelär.

İtaliyada Kovid -19dan soñğı täwlektä 382 keşe can birgän. Şulay itep kizü başınnan birle ülüçelär 27 meñ 359 buldı. Yoqtıru oçraqları 105 meñ 205. Sonğı täwlektä 2 meñ 317 keşe terelep çıqtı häm çirne ciñüçelär sanı 68 meñ 941gä citte.   

Franśiyädä Kovid-19 säbäple ülüçelär sanı 23 meñ 660qa citte. Virus açıqlanuçılar sonğı täwlektä 1520gä arttı häm 197 meñ 589 buldı. İldä kizügä qarşı kürelgän çaralar êtaplap betereläçäk. 11nçe mayda balalar baqçası, başlanğıç häm urta mäktäplärne teläwçelär sanına qarap aça başlıylar. Xökümät räise Êduard Filippe älege könnän soñ da mömkin bulğança küp keşeneñ öylärendä torıp êşläwlären däwam itüe kiräklegen assızıqladı.  Ul, kafe häm restorannar tışında, êş urınnarınıñ qabat açılaçağın citkerde.

Angliyädä Kovid-19 säbäple ğomere özelüçelär sanı soñğı 24 säğat’tä 586ğa arttı häm 21 meñ 678 keşe täşkil itte. Yoqtıru oçraqları da 3996ğa kübäyep 161 meñ 145kä citte. Xökümät belderüçe köndälek mäğ’lümatlar barı tik xastaxanälärdäge ülemnärne üz êçenä ala. İldä qartlar yortı häm pansionatlarda  sonğı 37 yıldağı in yuğarı ülem kürsätkeçläre terkälde. Bolarnıñ niqadäreseneñ koronavirustan buluı bilgesez.

Braziliyädä kizüdä sonğı täwlektä tağın 474 keşeneñ ğomere özelde. Şulay itep, ildä Kovid-19 arqasında yaqtı dön’yadan kitüçelär sanı 5 meñ 17gä citte. Yoqtıruçılar sanı 71 meñ 886.

Kön’yaq Amerika däwläte Êkvadorda koronavirus soñğı täwlektä 208 keşeneñ ğomeren aldı. Şulay itep, ildä bu kizüdä ülüçelär sanı 871gä citte. Yoqtıruçılar 24 meñ 258.



Bäyläneşle xäbärlär