Çernobıl'gä qurqınıç yanıymı?

Ukraina däwlät başlığı Vladimir Zelenskiy Çernobıl’ atom-töş faciğase bulğan töbäktäge urman yanğınınıñ stanśiyä öçen qurqınıç tudırmawın belderde. Ut 4nçe aprel’dä çıqqan ide.

Zelenskiy ütkän könnärdä 6 yanğın çığu noqtasınıñ sünderelüen äytte.

“Çernobıl’ atom-töş stanśiyäse, nurlanış qaldıqları saqlağıçı häm başqa kritik ob’yektlar öçen bernindi yanaw yuq,”-dide ul. Däwlät başlığı xalıqnı panika tudırmasqa çaqırdı.

“1986nçı yılnıñ 26nçı aprelendä birelgän sabaqnı xäterlibez. Berkem dä sezdän çınbarlıqnı yäşermäyäçäk. Çınbarlıq şul: andağı wäzğıyät’ kontrol’ astında. Kiyev häm anıñ töbägendä nurlanış däräcäse normadan çıqmadı,”-dide ul.

Yanğın kilep çığuğa säbäpçe bulğan keşelär poliśiyä tarafınnan saq astına alındı.

Ukraina êçke êşlär ministrlığı da yanğınnıñ sünderelüen, ämma qayber cirleklärdäge qorı ülän häm ärämälärdän töten kütärelüen däwam itüen belderde.