Könbatışta koronavirus: xäl könnän-kön naçar...

Dön’ya külämendä koronavirustan ülüçelär sanı 46 meñnän, yoqtıru oçraqları 910 meñnän arttı.

İtaliyada Kovid-19 kizüendä soñğı täwlektä 727 keşe can birde. Şulay itep ildä bu çirdän ğomere özelüçelär 13 meñ 155kä citte.

Franśiyädä koronavirus 4 meñ 32 keşeneñ ğomeren alıp kitte. İl bu kizüdä ülüçelär sanı buyınça Qıtaynı uzdı. Yoqtıru oçraqları isä 52 meñgä kilep terälde. Şul uq waqıtta, ildä kizü arqasında 3 million 600 meñ keşeneñ êşsez qaluı belderelde. Franśiyä mäşğul’lek ministrı Myurel Penikad äytüençä, koronavirus arqasında 337 meñ şirkät bölgän häm alarnıñ xezmätkärläre êşsez qalğan. Bu däwlätkä 11 million yevro zarar kitergän. Çönki êştän çığarıluçılar däwlättän xezmät xaqlarınıñ 70%ı külämendä posobiyä ala.  

Germaniyädä kanśler Angela Merkel’ kiläse atnada Pasxa bäyräme ikänen xäterlätte häm watandaşlarnı säyäxät itmäskä çaqırdı. “Pandemiya bäyrämgä qaramıy,”-dide ul.

Serbiyädä Kovid-19dan 28 keşe ülde, diagnoz quyıluçılar sanı – 1060.

Greśiyädä kizü 50 keşeneñ ğomeren aldı, yoqtıru oçraqları - 1415. Awrupalı tabiblar törkeme utrawlardağı sıyınuçı lager’larında naçar şartlarğa iğ’tibarnı cälep itte häm kizü waqıtında keşelek faciğase kilep çıqmasın öçen alarnı buşatırğa quştı.

Sloveniyada koronavirustan 15 keşe ülde, yoqtıru oçraqları 841gä citte.

Bosniyä-Gerśegovinada kizü 13 keşeneñ ğomeren aldı, Kovid-19 diagnozı 457 keşegä quyıldı.

Bolgariyädä koronavirustan ülüçelär – 9, yoqtıru oçraqları -412.

Avstraliyädä kizü 23 keşeneñ ğomeren özde, qurqınıç diagnoz 5 meñ 105 keşegä quyıldı.

AQŞta koronavirustan ülüçelär sanı 4 meñ 476ğa citte. 203 meñ keşe älege çirne yoqtırdı. Ülemnärneñ yartısı N’yu-Yorkta terkälde. Anda awıruçılar 12 meñnän artıq. Başqa ştatlarda da çirläw oçraqları zur tizlek  belän kübäyä. Konnektikutta ğomere özelüçelär arasında 6 aylıq bäbäy dä bar.

İlbaşı Donal’d Tramp AQŞtağı kürsätkeçlärneñ soñğı 24 säğat’tä rekord yasawın äytte. “Bu virusnıñ niqadär naçar buluın soñğı 1 köndäge sannarğa qarap ta añlarğa mömkin,”-dide ul. İlbaşı kiñäşçese Mayk Pens beldergänçä, kizügä qarşı kertelgän çaralar ğamälgä aşırılğanda, virusnı iyün’ ayına qadär ciñäçäklär.

AQŞ federal’ ğadättän tış xällär belän idarä itü xezmäteneñ Pentagonnan 100 meñ mäyet qapçığı sorawı açıqlandı.