İran yalğan söylime?

AQŞ däwlät särqatibe Mayk Pompeo İran dini liderı Ayätullah Ali Xamaneynıñ Kovid-19 kizüendä awıruçılar häm ülüçelär sanın da kertep bik küp mäğ’lümatnı dön’yadan yäşerüen alğa sörä.

Ul “Xamaney söylägän yalğannar keşelärneñ tormışın qurqınıç astına quya” dip isemlängän yazma belderü yasadı. Süz uñayınnan, anda Pompeo Kovid-19nı “Uxan’ virusı” dip atıy.

Belderüdä İran dini liderı yäşergän qayber çınbarlıqnıñ açıqlanaçağı äytelä.  

Pompeo İrannıñ şäxsi hawa yulı şirkäte Mahan Airnıñ uzğan ay Tähran-Qıtay marşrutında kimendä 55 säfär yasawın citkerä. Ul kimendä 5 ildäge berençe Kovid-19 oçraqlarınıñ İrannan çığuın alğa sörä. Pompeo İrannı millionnarça keşeneñ ğomeren qurqınıç astına quyuda ğayepli.

Belderüdä mondıy yullar bar: “İran rejimı üz mediśina xezmätkärläreneñ kisätülärenä qolaq salmadı häm täwge ülemnärne kimendä 9 kön buyınça inkyar’ itte. İran virustan ülemnär häm awıruçı sanı turında üz xalqına häm dön’yağa yağlan söyläwen däwam itä. Qızğanıç, çın sannar rejim beldergännärdän bik küp”.

Pompeo İrannıñ 2012nçe yıldan birle il tışındağı terrorçılar öçen 16 milliard dollar tügüen belderä.

“İran rejimı mediśina öçen qullanılırğa tiyeşle 1 million yevrodan artıq aqçanı urladı. Monnan tış, xäzerge waqıtta iñ küp ixtiyac bulğan bitlek, perçatka häm başqa mediśina kiräk-yaraqların qara bazarda satu öçen cıyıp bara,”-dip yaza Pompeo.

Ul AQŞnıñ İranğa sankśiyäläreneñ azıq-tölek, mediśina kiräk-yaraqları, daru häm başqa gumanitar yärdäm äyberlären üz êçenä kertmäwen, ilneñ mediśina şirkätläreneñ ğıynvar ayınnan birle sankśiyälärgä êläkmiçä diagnoz komplektı qaytarta aluın citkerde.

Pompeo AQŞnıñ çit illärgä 100 million dollarlıq mediśina yärdäme täq’dim itüen äytte. İsemlektä İran da bar.

“Xamaney bu täq’dimne kire qaqtı. Çönki yağlan teoriyälär çığaru öçen armıy-talmıy êşli häm üz ideologiyäsen İran xalqı mänfäğat’lärennän östen kürä,”-di Mayk Pompeo.