“Citär inde. Öyegezgä qaytığız häm şunda utırığız"

Xalıqnıñ koronavirusnı citdigä almawı könbatışta citäkçelärneñ açuın çığara başladı

1383894
“Citär inde. Öyegezgä qaytığız häm şunda utırığız"

İtaliyä koronavirus qarşında könnän-kön köçsezlänä bara. İldä soñğı 24 säğat’tä 601 keşe ülde. Şulay itep kizüdä ğomere özelüçelär sanı 6 meñ 77gä citte.

İspaniyädä ülüçelär isemlege ber köndä 462 keşegä arttı häm 2 meñ 182 buldı. İlneñ kizüdän iñ nıq zarar kürgän cirlege – Madridta, kümülär tuqtatılu arqasında, mäyetlärne morg urınına şähärdäge ber boz şuğalağına quyıp toru qararı çığarıldı.

Franśiyädä kizüdän can birüçelärneñ sanı 860qa citte. Kovid-19 êläkterüçelär – 20 meñ. İldä kiçä kizü başınnan birle iñ yuğarı ülem häm yoqtıru oçraqları terkälde.

Niderlandta virustan ülüçelär sanı 213kä, awıruçılar 4 meñ 749ğa citte. İldä 3 häm tağın da kübräk keşe bergä cıyıluı yäisä ber-bersenä 1 metr yarımnan da yaqınraq kilüe tıyıla. Qağıydäne bozuçılarğa 400dän 4 meñ yevroğa qadär ştraf kertergä uylıylar.

Germaniyädä 116 keşe koronavirustan ülde. Kanśler Angela Merkel’neñ koronavirus yoqtırğan tabibqa kürenüennän soñ yasatqan Kovid-19 testı negativ çıqtı. Ul, kisätü maqsatınnan, üzen karantinğa yapqan ide.

Greśiyädä kizüdä ğomere özelüçelär – 17, yoqtıru oçraqları – 695. Anda uramğa çığu tıyıla.  

Angliyä koronavirustan 335 keşesen yuğalttı. İldä, kibet häm daruxanälärdän tış, barlıq säwdä êşçänlege tuqtatıldı.Keşelärgä barı tik ixtiyacların alu öçen kibetkä häm berüze sport belän şöğıl’länü öçen öydän çığuı röxsät iteläçäk.

Kovid-19 oçraqları sanı buyınça Qıtay häm İtaliyädän soñ 3nçe urında baruçı AQŞta xalıqnı öylärennän çıqmasqa çaqıralar. Anda 35 meñ 225 keşe koronavirus yoqtırdı, 473e ülde. Cämäğat’çelek sälamätlege idaräse räise Jerom Adams AQŞta kizüneñ tağın da naçarğa taba baruın belderde.

Kanadada Kovid-19dan 24 keşe ülde, 2 meñ 35 yoqtıru oçrağı terkälde. Xökümät räise Djastin Tryudo xalıqqa yasalğan çaqırularnıñ citärlek däräcädä täêsir itmäwenä açuı çığıp: “Citär inde. Öyegezgä qaytığız häm şunda utırığız,”-dide.



Bäyläneşle xäbärlär